لوانت بتمول حملات إعلانية،عندك (ستارت اب) بتعمل فيه #كورسات،ماركتير بشكل عام؛ لازم تقرا الكلام اللي جي ده كويس،وتبدأ تنفذه من دلوقتي؛عشان متقعش ف الأخطاء اللي وقعوا فيها الناس اللي قبلك،وتتغلب بكل سهولة ع (كل منافسيك).
ف المقال ده هنركز ع الأفكار اللي هتخلينا نجذب أكبر قدر من العملا؛عشان نحفزهم ونشدهم إنهم يجوا ياخدوا كورساتهم عندك انت وميروحوش للمنافسين؛لأن أي حد دلوقتي مش لاقي شغلانه، يقوم يأجر أي قاعة والسلام،ويفتح لابه ويعمل إعلان ممول ويقولك احنا عاملين كورس كذا وشكرا.
خلونا من غير مقدمات لاتهش ولا تنش ندخل ف الأفكار ع طول😄😆
ملحوظة ع السريع كده: الأفكار ف المقال ده هتبقا متقسمة ل3 أجزاء:
_جزء قبل ما العملا تجيلك (مرحلة جذب العملا).👏
_جزء أثناء ما العملا يكونوا موجودين عندك (مرحلة المفاجآت).
_جزء بعد لما تقول للعميل باي باي (مرحلة المتابعة والtop of mind awareness).💪
1)مرحلة جذب الزبون:😃 (ركز ف الجزء ده جدا؛ عشان كل الشغل هيتبني عليه)
٠)لو بتقول إنك عندك لكل دارس (لاب لوحده)؛لازم تصور اللابات ده فعلا وتوريها للناس عشان المصداقية.
١)صور المكان نفسه عشان توري للناس مستوي النظافة عندك،والمكان اللي هيروحوه ويقعدوا فيه؛عشان يألفوا المكان قبل ما يروحوا ويكونوا مستريحين نفسيا.
٢)قول ع عنوان المكان بتاعك بالظبط عشان الناس متوهش،و أوصف كذا طريق للوصول لمكانك،واسأل العملا بتوعك لو أي حد مش عارف يجي ازاي،يبعتلك ف الرسايل ويسألك،وانت توصفله المكان بالظبط من بيته لحد مكانك.
٣)ركز ف إعلانك الممول عن الكورس/الدبلومة ع الميزة التنافسية اللي عندك (value proposition/competitive advantage).
يعني إيه اللي يخليني آخد الكورس ده عندك انت بالذات،ومروحش لحد تان؟
(سعرك/جودة الكورس/خبرات المحاضرين/إمكانية التقسيط/المكان قريب من العملا المستهدفين/مدة الكورس كبيرة/عندك خصم أو عرض....إلخ).
٤)اهتم جدا بديكور المكان بإنه يكون ملهم لأي حد يدخله وموجوده مثلا براويز فيها صور ناس مشهورة ف المجال اللي بتقدم فيه الكورس،مع عبارات محفزة وملهمة/صور لشخصيات ملهمة بوجه عام.
٥)ركز ع اختيارك للألوان بتاعة المكان إنها متكونش ألوان غامقة؛عشان بتقفل نفسية العميل من المكان،ومش بيبقا قاعد مستريح.
اهتم بإن الألوان تبقا فاتحة وتوحي بالتفاءل والأمل والإنجاز والراحة النفسية.
زي اللونين (الأصفر مع البنفسجي)/(الأخضر مع الأبيض).
وممكن تدخل تشوف فيديوهات لنظرية الألوان.،هتساعدك ف اختيار الألوان المتناسقة مع بعض،والألوان اللي بتدي راحة نفسية وبصرية للعميل.
ممكن تدور ع (Pinterest) بكلمة (exhibition) هتديك أفكار كويسة جداااا.
وده مش مصاريف ع الفاضي، دي استثمارات (طويلة الأمد) ف المكان بتاعك.
٦)يكون ف المكان جزء ترفيهي للعملا بتوعك يستمتعوا بيه وقت البريك/بعد مال (session) تخلص؛عشان ميبقاش الجو كله (تعليمي بحت) من غير حاجه تفك (الجو الروتيني) ده زي:
(البلايستيشن/بلياردو/بنج/
٧)تصور الأساتذة/الدكاترة/
٨)لازم العملا بتوعك يعرفوا هما هياخدوا إيه بالظبط ف الكورس اللي بتقدمهولهم.(تقولهم إيه محتوي الكورس بتاعك)( outline)؛
عشان تشجعهم يجولك لما يلاقوك فعلا هتغطى وهتشرحلهم كل الأجزاء والنقاط المتعلقة بالمجال اللي عايزين يحترفوه ف كورس واحد.
٩)فكرة التقسيط: يكون عندك إمكانية إن العميل يقسط ثمن الكورس ع كذا دفعة؛عشان تحل مشكلة السعر عند بعض العملا؛وبالتالي تجذب ناس أكتر ليك،وتبقا ليك ميزة تنافسية قوية عن غيرك.وتكتب ف الإعلان إنه مثلا (مفيش فواااااااايد) ع التقسيط.
١٠)تعمل خصومات ف فترات المناسبات(الكروية/الدينية/
-عيد الفطر
-العيد الكبير
-رمضان
-بداية السنة (داخلين عليها أهوه)(يارب تبقا سنة خير ع الجميييع!) 🙌🙌🙌
-عيد ست الحبايب يا حبيبة😍
-فوز المنتخب وتأهله💪
-الأورانج/الوايت/الفراي داي😅
-فرحة أكتوبر🔥
-عيد العمال👷(ملهمش نفس يعني ولا إيه؟😅)
١١)تكون الخصومات (لفترة محدوووووودة)،وبعد كده الكورس بيرجع لسعره الأصلي تان.
وكل يوم تنزل بوست وتقول فاضل ع نهاية الخصم (كذا) يوم عشان تحفز الناس أكتر وميضيعوش الفرصة من إديهم.
ويكون مثلا كلمة (فاضل 4 أيام مثلا ع نهاية الخصم اللي احتمال ميتكررش تان) بخط كبير ف الصوره اللي بتنزل مع البوست.
ولازم نحدد مدة الخصم عشان نحفز العميل دايما إنه يشتري/يشترك،ومنسبش العملية مفتوحة ع البحري😄
وتنزل زي ما قولنا كل يوم بوست مع تصميم بسيط تقول فاضل (كذا يوم) ع انتهاء خصم كورس(كذا)؛عشان يحس العميل إنه كل يوم بيعدي عليه من غير ما ياخد الكورس معاك إنه بيضيع فرصة ممكن متجلوش تان.
واحنا (كبشر) مش بنحب نضيع الفرص،وبنحب اننا نستغلها أحسن استغلال.(متنساش تلعب ع الحتة ده هتفرق أوي معاك ف عروضك/إعلاناتك عموما)😃
ملاحظة: (أوعاك) تمد الخصم (يوم واحد) بعد ما تخلص المدة اللي انت محددها؛عشان يعرف العميل إنك جد، وكلمتك واحدة، وإنك فعلا لما بتقول كلمة بتنفذها، وعشان لما تعمل خصم تان زي ده يستغله بسرعه، وعشان ميحسش الناس اللي استغلوا فعلا الفرصة واشتركوا معاك من الأول قبل ما الخصم يخلص إنك ضحكت عليهم، و زيهم زي اللي اشتري/اشترك بعد ما الخصم خلص.😞
بالعكس دول لازم فعلا يحسوا إنهم كانوا محظوظين لإنهم استغلوا الفرصة ده وغيرهم خسر.😎
ولو عندك أي عميل طلب منك تجددله الخصم،أو إن الخصم يشمله بعد انتهاءه.ترد عليه بكل أدب وتعتذرله لأن مدة الخصم خلصت وتاخد المحادثة ده اسكرين شوت وتنزلها في بوست عشان يشوفها كل اللي اشتري/اشترك معاك قبل ما فترة الخصم تخلص.
١٢) تعمل مثلا خصم للي هيعمل منشن لصاحبه،ويشير البوست،ويعمل لايك.
وتتأكد من ده عن طريق إن العميل يعمل اسكرين شوت لكل مرحلة من دول،ويوريك بطاقته فيها نفس الإسم بتاع إسم الكونت بتاعة؛عشان تتأكد إنه نفس الشخص.
بس خلي بالك: الخصم ف الحالة ده ميكونش كبير قوي؛عشان أعداد كبيرة من الناس هتعمل كده فانت متخسرش، ولا يكون صغير عشان الناس تتشجع وتبدأ تتفاعل مع اللي قولتهولهم.
١٣) ممكن تعمل مسابقة معينة ف مجال الكورس اللي انت بتقدمة،واللي يكسب فيها ياخد الكورس (مجااانا).
يعني مثلا: لو مجال تصميمات السوشيال ميديا: تقول ع فكرة تصميم معين و صاحب أفضل تصميم هو الكسبان.
لو مجال كتابة محتوي: تطلب كتابة محتوي/(كابي) عن موضوع معين وأحسن (كابي) صاحبها اللي يكسب.
لو مجال تسويق: تطلب من الناس إنهم يعملوا (SWAT analysis)لشركة معينة... وهكذا. 😃
(ابدع انت بقا ف مسابقاتك، وف شروط المسابقة)😃
١٤) ممكن تعمل كتاب ورقي/إلكتروني فيه كل كلمة هتتقال ف المحاضرات/الكورس؛ عشان لو حد غاب بسب ظرف وضاع اليوم منه؛ ميوقعش منه الجزء اللي محضروش.
وتأكد ع النقطة ده ف المحتوي بتاع الإعلان اللي نازل بيعلن ع الكورس،وتقول إنك مش بتدي بس الكورس لمرة واحدة وخلاص،واللي حضر حضر واللي غاب دا ذنبه لوحده!
❌لا، احنا هنديك (كورس يقعد معاك طول العمر). تقدر نستفيد منه دايما وترجعله ف أي وقت.
ويا سلام بقا لو زودت ال (experience) ده وعملت (sound track)لكل كلمة برده موجودة ف الكتاب اللي انت لسه عامله فوق ده.😃
عشان اللي خد الكورس بعد كده ف وقت فراغه يقدر يراجع الكورس تان والمعلومات اللي فيه مع نفسه وقت ما يكون ف المواصلات مثلا...وهكذا.
عشان يستفيد بوقته؛لإنك حريص طبعا ع وقت العميل بتاعك(ركز ع الحاجات ده كويس) 😃
١٥) لو عملت خصم قول آخر ميعاد يوم (كذا)،بس ف نفس الوقت عشان تحفز أكبر عدد من الناس يشتركوا معاك/ميضعش عليهم الخصم.
تقول إنك لو معكش الفلوس كلها دلوقتي،ممكن تيجي وتدفع جزء من المبلغ،والجزء التانى تدفعه مع أول محاضرة مثلا. عشان تبقا ضمنت عميل ف (جيبك)،وهو هيكون فرحان إنه لحق الخصم ومراحش عليه.
بالرغم إنه مكنش معاه الفلوس كاملة.(العبها بذكاء) 😃
١٦) من الحاجات اللي بتشد العميل لبوستاتك/إعلاناتك الممولة، هيا التصميم اللي بيبقا نازل مع البوست.
أنا لو بعمل (scroll) ع (التايم لاين)،وماشي بسرعة (سونيك)؛مش هاخد بالي من كل البوستات،لكن هقف بس ع البوست اللي منزل صورة تشدني.
واحنا عارفين إن من أساسيات أي (إعلان ممول ناجح)و برنس ف نفسه كده هو (الاستهداف/المحتوي/
ولو حاجه منهم (مش مظبوطة)، الإعلان بتاعك بيفشل بنسبة (٧٠%).
فنركز كويس جدا ع التصميم اللي نازل مع بوست الكورس عشان هيحدد نجاح/فشل الإعلان بتاعك.
مش مهم ع فكرة يكون التصميم (بروفيشنال) أو حاجة (فاخر من أبو أخر😂).
المهم إن التصميم يشد انتباه اللي يشوفه، ويخليه يبدأ يقرا المحتوي اللي انت كاتبه.
ومش شرط برده إن التصميم يكون بيعبر عن المحتوي بتاع الإعلان، المهم تكون كاتب حاجة تشد بيها العميل اللي بيشوف البوست/وتثير فضوله عشان يقرا.😃
الخلاصة: المهم التصميم يكون (eye-catchy)، مش مهم يكون (professional).
١٦) ممكن تعمل خصم للتوأم. هتجبلك (mentions) كتير😃
١٧) ممكن تدخل ع الصفحات اللي بتعلن عن وظائف ف المجال اللي انت بتدي فيه كورسات، وتاخد اسكرين شوت،و تنزلها ع صفحتك،
وتقول لو خدت معانا الكورس هتبقا مؤهل إنك تشتغل ف الشركات ده اللي مرتبها (كذا) أهوه.
وكمان الحركة ده حلوة؛عشان تبرر سعر الكورس بتاعك لو غالي شوية.
يعني انت مثلا لو بتدي الكورس ب (٢٠٠٠جنية)، وعملت اسكرين شوت لشركة طالبة حد تعينه ف المجال اللي انت بتدي فيه كورسات بمبلغ(٣٥٠٠جنية).
ساعتها تعرف تقنع العملاء المحتملين بتوعك بإن سعر الكورس مش غال،مقارنة بأول مرتب انت هتاخده لو خدت معانا الكورس.(سهلة أهوه!)😃
١٨) اعمل (brand awareness) عن طريق انك تقول للناس إن الكورسات ده ازاي هتساعدهم يلاقوا شغل، بمرتبات كويسة، ووضعهم المعيشي هيكون أفضل. (العب ع الحته ده كويس)(والعب inbound marketing ).😃
١٩) خلي دايما طرق التواصل/العنوان بتاعك واضحة ف البوستات/الإعلانات بتاعتك😃
٢٠) متوعدش الناس بأي حاجه متقدرش تنفذها.
الثقة ف المكان لو راحت مبترجعش تان.
٢١) من أهم الأدوار ف جذب العميل ليك هو دور ال(moderator)؛لأن ردوده بتدي انطباع للعميل عن الجو عامل ازاي ف المكان/عن الناس أصحاب المكان،اللي هيتعامل معاهم هناك.
فلازم ال(moderator) يدخل ف علاقة ويقعد يتكلم مع كل رسالة/تعليق من العميل،كأنه واحد صاحبة وبيدردش معاه، عشان يبني معاه فعلا علاقة،ويحببه ف المكان اللي احتمال يروحه.
مش كل لما حد يكتب تعليق بيستفسر فيه عن المكان/السعر..... الخ.
تلاقي رد واحد واسطمبة واحدة ع كل التعليقات:
(تم الرد ع الخاص)
أو
(Check your inbox)
طبعا ممكن بيعملوا كده عشان السعر ميتقالش ف العلن،والتفاعل يزيد،والبوست يروح لناس أكتر(مفهومة طبعا الحته ده).
لكن لازم برده نتعامل مع كل رسالة كأنها رسالة مستقلة لوحدها.
يعني نبدأ الأول نرحب بصاحب التعليق،ونشكره ع اهتمامة بالكورس بتاعنا،ونقوله إنه إن شاء الله هيبقا من الموهوبين ف المجال ده وكده.
ولو فيه مجال للدردشه ندردش معاه شويه،
ونبعتله بقا التفاصيل كاملة ف رسالة ع الخاص.
ومتنساش تقول للعميل بإسمه (ازيك يا عاليا) وهكذا.. (بتفرق مع الناس جداا) (حتة علم نفس كده). 😃
٢٢) ممكن تعمل خصم لأي حد عيد ميلادة ف خلال ال ١٠ أيام الجايين مثلا.
أو أي حد اسمه مثلا (محمد صلاح)/(أحمد رضا)(أي اسم بقا😂) وعليك وع التريند😁.
الموضوع ده بينتشر جامد وهيعملك (brand awareness) حلو أوي.😃
٢٣) ادي للناس اللي عايزهم ياخدوا الكورس معاك حاجة مجانية تشدهم ليك، وتعرفهم بيك وباللي بتقدمه وبعد كده بيع اللي انت بتقدمه عن طريق ال(inbound marketing).
يعني مثلا: ممكن تعمل كتاب/كتيب صغير فيه (١٢طريقة) عشان تتعلم(كذا بطريقة صح)(شيء متعلق بمجال الكورس).
وتطلب من اللي عايز الكتاب/الكتيب ده إنه يحط إيميله/رقم تليقونه عشان تبعتهوله(شوف بقا انت هتستخدم الإيميل ولا الواتس عشان تجيب ال lead دول).😃
وممكن بردة تقسم المعلومات/الطرق اللي ف الكتاب ده ل (١٢ بوست) تبعته للعملا دول ع مدار (١٢ يوم)،بدل ما تبعتله الكتاب كله مرة واحدة.
والطريقة دي أنا شخصيا بفضلها عن الطريقة الأولي؛عشان بتخليك دايما ف ذهن العميل ال(١٢يوم)،بدل ما تبعتله الكتاب كله مرة واحدة ويفتكرك ليوم واحد بس.
وبكده هيبقا معاك الإيميل/رقم التليفون،وتقدر بعد كده تبعتله محتوي إضافي(تعليمي-تحفيزي) وركز ع كلمة إضافي ده،وحسسه إنك بتديله حاجة إضافية مش واجب عليك إنك تدهاله؛عشان الوعد اللي كان بينكوا كان (١٢ بوست)بس.
بس انت بتبعتله محتوي إضافي عشان(شخص مميز/يطور مهاراته أكتر/أي كلام تحفيزي يلمس مشاعرة) .
وبكده هيبقا عنده ولاء ليك أكتر.(ده اللي اتكلمنا عنه ف بوست"أقوي بوست عن ولاء الزباين").
لحد ما يتشجع بقا ف الأخر،وياخد (الأكشن) اللي انت بتحارب عليه ومستنيه.
وهو إنه ياخد معاك الكورس.
خد بالك: الكام سطر اللي فاتوا في النقطة ده بيلخصوا عملية ال(lead generation) ع السريع، وبيعلمك ازاي تجيب(lead) للبيزنس بتاعك، وتخليهم عندهم ولاء ليك وانت حاطط رجل ع رجلين😃
٢٤) لازم المحتوي اللي انت بتنزله في بوستاتك يكون (related) بالمجال وبال (audience) اللي انت (متارجتهم).
يعني لو بتدي كورسات (تصميمات السوشيال ميديا).
تنزل تصميم وتقول اتعمل ببرامج ايه؟ وانك بتدي كورس عن البرامج ده ومعانا هتعرف تعمل تصميمات مبدعة وقوية زي كده.
وممكن تعمل فيديوهات لأحد المحاضرين اللي عندك بيعمل تصميم قوي/بيشرح حاجة معينة ف مجال التصميم أن غيره،وتبدأ تسوق.
طبعا الحاجات ده بتبقا نبذات/فيديوهات بشكل سريع عشان تدي للي بيفكر ياخد معاك نبذة عن احترافية وقوة الكورس اللي عندك؛عشان متحرقش الكورس.(طبق بقا الكلام ده ع أي مجال بتدي فيه كورسات). 😃
٢٥) ممكن يكون فيه مشروب (مجاااني) كل بداية محاضره.المكان بتاعك يعتبر (شقتهم التانية)😃
٢٦)خليك ع قدر الحدث: يعني مينفعش تكون بتقدم مثلا كورسات لتعليم التصميم، وانت أصلا منزل مع بوستاتك تصميمات غير احترافية،ومش بتدل خالص ع إنك ممكن تعلمني فعلا ازاي أصمم تصميمات كويسه واحترافية و كريتيف.
أو إنك بتعلن عن كورس لتعليم (كتابة المحتوي) وانت بوستاتك كلها مليانة غلطات إملاء ونحو/مش بتهتم بوجود (CTA)/الكلام بتاعك مش منظم ولا مرتب/الأفكار مش متصلة ببعض/بحس بملل وانا بقرا بوستاتك/طريقة الكتابة مش مريحة للعين/مفيش فواصل بين كل فكرة ف المحتوي/مقدمات بوستاتك متشدنيش عشان اقراء المحتوي بتاعك/مفيش علامات ترقيم أو موجودة بس غلط/إلخ.
(كنت نفعت نفسك يعني). 😃
٢٧) ممكن تعلن ف بوستاتك إن ف آخر الكورس/الدبلومة، هيبقا فيه (أحسن متدرب) ال(best trainee) وده هيرجع له فلوس الدبلومة اللي دفعها بسبب تفوقه. عشان المتدربين يشدوا حيلهم معاك،ويتشجعوا انهم ياخدوا معاك الكورس،ويتنافسوا عشان فيه فرصة إنه يسترد المبلغ اللي دفعهولك ف الكورس.(يروح يجيب بيهم بيبس😂).
٢٨) ممكن برده تعمل أول محاضرة ف الكورس/الدبلومة هتبقا بشكل مجاااني(trial session)؛عشان العملا المحتملين واللي خايفين يتدبسوا، يجوا ويجربوا،ويعرفوا مدي قوة المحتوي/مدي خبرة المحاضرين/مدي روعة المكان/مدي صدق الكلام اللي كنت بتقوله ويتعلن عنه.
(الخطوة مش هيقوم بيها إلا المكان اللي واثق من نفسه فعلا ومن إمكانياته، وصادق ف كل كلمة بيقولها.
والأعداد برده هتكون محدودة طبعا، مش كل الناس هتيجي😃
٢٩) إنك تعلن عن تخصيص بعض المقاعد لغير القادرين،وتحط شروط للمتقدم بالطلب ده. زي إنه يكون يتيم أب/أم.. وغيرها من الشروط (انت و دماغك بقا) والموضوع يكون سري طبعا 😃
الفكرة ده هتظهرك قدام العملا إنك (بني آدم) زيهم وهتبقا هنا بتطبق مبدأ ال(marketing humanization) بجد،وهيحسوا فعلا إنك مش عامل الكورسات ده عشان الفلوس وبس.
بدليل إنك كنت ممكن تعمل المقاعد ده بفلوس عادي،بس انت روحك المحبة للسلام سيطرت عليك؛فقررت تشع خير ف أنحاء التايم لاين😃
٣٠) وآخر فكرة ف مرحلة جذب الزبون:إنك متحاولش أبدا تبقا مثالي ١٠٠%، وإنك تظهر قصاد العملاء إن كل حاجة عندك مظبوطة أوي؛عشان كان غيرك أشطر.
خليك واقعي ومنطقي ف كلامك شوية عشان تبقا مقنع للي بتكلمه.
يعني مثلا: قول آه أنا عندي الكورس أغلى من كل المنافسين، بس المحتوي اللي أنا بقدمة (مفيش أي حد تان) هيدهولك/إنك هتديهم (محتوي مفيش زيه) ف مقابل السعر ده؛هيوفر عليهم سنين وشهور من المذاكرة والبحث والدراسة. يعني مبلغ الكورس ده هيوفر عليك فلوس كتيرة هتصرفها ف أماكن تانية ع الفاضي/مجهود/وقت/تعب كتير.
فمينغعش نخترع العجلة من أول وجديد ونبدأ من الصفر، احنا لازم نتعلم من المحترفين واللي سبقوا،ونكمل ع العلم ده😁
كده نكون وصلنا ف قطر تسويق الكورسات بتاعنا لنهاية المرحلة الأولي(جذب العميل).
ونبدأ ف المرحلة التانية: تسويق الكورسات أثناء جذب العميل(مرحلة المفاجآت):
٣١) لازم ف كل (session) يبقا فيه (best trainee)،وياخد شهادة تقدير/ساعة/فلاشة مثلا،و يتصور صورة ف المكان،وتنزلها ع صفحات السوشيال بتاعتك،و يتقال هو ليه أفضل واحد النهاردة. عشان مثلا عمل التصميم الفلاني،وتنزل جمب صورته التصميم مع الشهادة/الساعة/
٣٢) لازم برده بعد كل محاضرة تنزل شغل الناس ف المحاضرة ع السوشيال ميديا بتاعتك،وتوري للناس التانية قد إيه الناس مستواها بيفرق كل محاضرة عن التانية،وعرفوا يعملوا حاجات قوية و إبداعية لما خدوا الكورس/الدبلومة معاك.
٣٣) لازم برده كل فترة والتانية تنزل في
فيديوهات متصورة من داخل المحاضرة نفسها.
٣٤) خلي اللي يسجل معاك ف الكورس يسجل ب:
⬅رقم التليفون: عشان التواصل؛وعشان موضوع الواتس وال (lead generation)،اللي اتكلمنا عليهم فوق ف النقطة رقم ( ٢٣)،وهتحتاجه برده بعدين،وهقولك ليه تحت.(ف مرحلة المتابعة).
⬅الإيميل: عشان برده نفس السبب بتاع الواتس اللي اتكلمنا عليه فوق،وهتحتاجة بعدين برده وهقولك ليه تحت.( ف مرحلة المتابعة).
⬅عيد الميلاد: عشان لو حد صادف إن عيد ميلاد جه ف الفترة اللي هو معاك فيها ف الكورس،يبقا ليه هدية رمزية كده/بوست/رسالة ع الفيس بتهنيه.(هتفرق جدااااا).
نيجي بقا لآخر مرحلة ف تسويق كورسنا اللي مطلع عنينا ده،وهيا مرحلة: المتابعة وال(top of mind awareness):
٣٥) بعد ما الكورس يخلص. ابدأ حفز الناس اللي خدت معاك الكورس إنهم يصوروا معاك فيديوهات،يتكلموا فيها عن مدي قوة محتوي الكورس/المكان/المحاضرين/
والحافز ده ممكن يكون عبارة عن استرداد مثلا (١٠٠جنية) من مبلغ الكورس.
وبعد كده تنزل الفديوهات ده ع السوشيال وتبقا موجودة ك (reviews) عن المكان،وممكن كمان تستغلها ف عمل إعلان ممول.
٣٦) الشغل اللي الناس اشتغلته بإديها من تطبيق ف المحاضرات،لازم تنزله كله بعد ما الكورس يخلص؛عشان توري الناس الشغل بتاع الناس اللي خدت الكورس معاك ع أرض الواقع.
٣٧) بعد انتهاء الكورس تعمل كده زي يوم احتفالي،وتدي لكل واحد شهادة تقدير محترمة تقديرا لجهوده وحضوره معاك الكورس، ولو فيه هدايا رمزية ك دعاية ليك هتبقا حاجة عظيمة جدا زي:
كشكول
قلم
شنطة
تي شيرت
ومكتوب عليهم اسم المكان بتاعك(المهم تكون حاجه بيستعملها الشخص ع طول؛عشان ع طول تكون الحاجة ده قدامه وانت ف دماغه).
وممكن تعمل كده مع الناس اللي هتجيلك ف اليوم المجاني اللي اتكلمنا عليه فوق👆
عشان تفضل ع طول قدامه و فاكرك. ولما يقرر فعلا ياخد كورس ياخده معاك انت.
٣٨) أي حد خد معاك الكورس لازم تديله كارت مثلا؛عشان لو حب يجي ياخد كورس تان معاك يكون ليه خصم.
٣٩) ممكن ف آخر الكورس، تدي الناس هدية من نفس نوع الكورس!
(يعني إيه)؟!
يعني لو بتدي كورس تصميم: تديهم مثلا برامج التصميم آخر إصدار+الكراك بتاعها/ملحقات التصميم زي:
الفونتس
شوية vectors
صور hd هتساعدهم ع التصميم
ماوس/كيبورد/حاملة ماوس مجانا.
أو لو بتدي كورس محاسبة: تديهم ملف بيتكلم عن أسءلة الإنترفيو بتبقا عاملة ازاي/ملف فيه كلمات المحاسبة بالانجليزي... إلخ.
لو بتدي مثلا برده كورس تسويق: تديهم (templates) للخطة التسويقية وغيرها/تديهم نسخة من كتاب الكتروني مدفوع من ع أمازون بيتكلم ع التسويق هدية مجانية ليهم.
وهكذا.......
٤٠) فاجأهم ف نهاية الكورس ورجعلهم (٢٠/٣٠/٤٠ جنية) أي مبلغ يعني حتا لو بسيط من ثمن الكورس،وفرحهم ف آخر يوم ليهم معاك.
المبلغ ده هما هياخدوه وهيخرجوا من عندك، يطلعوا ع أي مطعم يأكلوا ف آخر يوم مع أصحابهم مع بعض.
بس الحركة ده هتعلم فيهم جدااااا،خاصة إنهم عارفين إن ده خلاص آخر يوم ف الكورس،والمبلغ مدفوع بالكامل،وأكيد مش هيطولوا ولا مليم من الفلوس اللي دفعوها خلاص. تقوم انت بقا عامل الحركة ده.
ويا سلام لو الفلوس ده محطوطة ف ظرف/علبة شيك كده صغيرة. كل ده تزويد ف القيمة،وف ال (experience) اللي بياخدها العميل منك. وبتكون حاجة محفوظة ف الذاكرة (memorable) وصعب تتنسي (unforgettable).
وانا كنت قريت قبل كده ف علم النفس الاجتماعي إن البشر دايما أكتر حاجة بيفتكروها هيا أول موقف وآخر موقف.
فاحرص دايما ع إن البدايات تبقا عسل، والنهايات والختامات مسك😃😃
٤١) اطلب من الناس اللي خدت الكورس معاك كتابة (ريفيو/تقييم) للكورس اللي خدوه ع صفحة الفيس بتاعتك.
وتاخد كل التقييمات ده+أي رسالة+أي تعليق كان فيه مديح/ثناء فيك/ ف المكان/ف المحتوي/ ف المحاضرين اسكرين شوت جميل، وتنزلهم عندك ع الصفحة؛لأن الناس مش هتجاملك، وهيبقي نقد واقعي ومن طرف يعتبر إنه محايد.
أكيد مش محتاج أقولك إن ف وسط الاسكرينات ده يكون فيه تعليق/إتنين بشكل سلبي.
بس انت تكون رادد عليهم بأسلوب محترم، وتوضح لصاحب التعليق/الرسالة كل حاجة بكل شفافية؛عشان زي ما قولنا تبقا واقعي مش مثالي.
ف الجزء اللي جي ده هقولك بقا طرق المتابعة مع العميل،بعد ما خلاص ما يكون خد الكورس معاك وروح بيتهم واتعشي بالمكرونة البشاميل😂؛عشان تخليه (loyal) ليك وي (recommend) اللي حواليه بكورساتك،ويشيد بالمكان بتاعك.ولو هو عايز ياخد كورس تان يجي ياخده (معاك انت).
وفريدة ال (recommendations) ده انها بتجيبلك (high quality clients)، ودول العملاء اللي بيبقوا عارفين عن اللي بتقدمه، وقابلين أسعارك، ومستعدين يخوضوا التجربة معاك.
وده كله بسبب تأثير ال (peer/friends pressure) عليهم😃
٤٢) لازم تعمل(group)(واتس أفضل)؛تجمع فيه كل الناس اللي خدت معاك الكورس بتاعك. وده فايدة إني قولتلك تاخد أرقام كل الناس اللي هتاخد معاك الكورس.وهقولك تحت👇 هتعمل ايه ع الجروب ده.
٤٣) هتنزل ع الجروب ده كل طلبات التوظيف اللي بتنزلها الشركات بتطلب حد يشتغل ف مجال الناس اللي ع الجروب ده خدوا كورسات فيها عندك.عشان تساعدهم يلاقوا وظيفة بشكل أسرع.
٤٤) لو حد حصل ع وظيفة منهم،وبعتلك مثلا يشكرك؛تاخد برده اسكرين وتنزلها عندك.
٤٥) تنزل ع الجروب ده أي حاجة جديدة متعلقة بالمجال اللي خدوا فيه الكورس معاك/أي تحديث للكتاب الإلكتروني اللي خدوه منك/لو فيه خصم ع كورسات جديدة/تدخل ف نقاشات معاهم وتشوف طموحهم عامل ازاي وتبني معاهم علاقة صداقة حقيقية وقوية.
٤٦) لو انت احتاجت موظفين يشتغلوا معاك ف المجال اللي بتدي فيه الكورسات،لازم الناس اللي خدت معاك كورسات ف المجال ده تكون أول ناس ع علم بالموضوع لأنهم الأولي.
٤٧) حاول تقول للناس وتثبتلهم إن فيه ناس تانية (كتييييييرة)خدت معاك الكورس/الدبلومة ده قبل كده، وساعدها إنها كمان تشتغل ف شركات كبيرة.
وتثبت ده بالاسكرين شوتس اللي خدتها للناس اللي بعتت تشكرك ع إنها لقت وظيفة بعد الكورس/صور للناس اللي كانت بتحضر معاك ف كل (round) /اسكرين للتوصيات اللي ع صفحتك/تقول مثلا إن فيه(٦٠)شخص لحد دلوقتي خدوا كورسات معانا وتنزل شغل ليهم عمله معاك وهكذا...
طب ده ليه؟
لأن الناس بطبيعتها بتميل إنها تعمل زي غيرها، وبتحب دايما تقلد،وتعمل زي الناس. عشان حاجة اسمها (العقل الجمعي)(ف علم النفس الاجتماعي).
وطالما العدد الكبير ده كله خد معاك؛يبقا انت good مكان😁
الفكرة النص والأخيرة😃) وهيا إن كل فكرة من الأفكار ده لازم تتبروز لوحدها،أو ممكن يبقا معاها فكرة تانيه بالكتير ف بوست لوحدهم؛عشان تدي لكل فكرة حقها،والناس تعرفها كويس،وتحفزها إنها تاخد أكشن معاك.😃
تخيل معايا لو طبقت كل الأفكار ده هيبقا عندك عملا قد إيه؟ وعملا عندهم ولاء قد إيه؟ وهتضرب كل منافسيك ف مقتل ازاي؟!
تسويق الكورسات مش حاجة صعبة خالص،
بس عايز دماغ شغالة، وبتفكر بدماغ العميل، قبل ما تفكر بدماغها هيا.
الأفكار ده مش هيا بس اللي موجوده.أنا شخصيا كتبت كل الأفكار ده كلها ف قاعدة كده وأنا بفكر،و بتخيل نفسي مكان العميل،وبفكر إيه اللي يخليني أروح آخد كورس ف مكان،ومخدش ف مكان تان.
وف الآخر طلعت بالأفكار اللي قدامكوا ده.
وانت ممكن تجيب أفكار تانية وأحسن من كده بكتير، ففكر ثم فكر ثم فكر، ثم نفذ، ثم ابدع، ثم هتوصل وهتنجح بإذن واحد أحد😃
أنا عارف انك وانت بتقرا دلوقتي فيه لمبات/كشافات استاد القاهرة الدولي نورت فوق شعرك. فياريت تفيدنا وتفيد غيرك بفكرة واحدة بس منهم ف الكومنتات اللي تحت صباعك الشمال/اليمين (أيهم أقرب)😂
منقول من بيدج ماركتينج عالسريع
 فكرة جديدة عشان تسويق كورساتك صح/تعمل #الإعلانات_الممولة الخاصة بالكورسات اللي تخليك تجيب التفاعل اللي انت عايزة+أمثلة عملية وم...){kind=link}
تعليقات: 0
إرسال تعليق